काठमाडौं, जेठ ३ । काठमाडौँको चन्द्रागिरि नगरपालिका–३ थानकोट खरिबोटमा घरायसी विवादका क्रममा चक्कु प्रहार हुँदा एक जनाको हत्या भएको छ।

Advertisement

महोत्तरी घर भई हाल थानकोट बस्दै आएका अन्दाजी ३८ वर्षीय समी अहमदले आफ्नै सालो नाता पर्ने २५ वर्षीय जाकिर मन्सुरीमाथि तरकारी काट्ने चक्कु प्रहार गरेका हुन्। पारिवारिक विवाद उग्र बन्दै गएपछि अहमदले मन्सुरीमाथि धारिलो चक्कु प्रहार गरेको प्रहरीले जनाएको छ।

चक्कु प्रहारबाट गम्भीर घाइते भएका मन्सुरीलाई तत्काल उपचारका लागि सतुङ्गलस्थित मेडपोइन्ट अस्पताल लगिएको थियो। तर, उपचारकै क्रममा चिकित्सकले उनलाई मृत घोषणा गरेको जिल्ला प्रहरी परिसर काठमाडौँका प्रवक्ता पवन भट्टराईले जानकारी दिनुभयो।

घटनाका मुख्य अभियुक्त अहमदलाई प्रहरीले नियन्त्रणमा लिएको छ र घटनाबारे थप अनुसन्धान भइरहेको छ।