काठमाडौं, जेठ ७ । रूपन्देहीको सैनामैना नगरपालिका–३ दर्खासेस्थित सडकमा लु. प्र ०१–००१ ह २७५३ नम्बरको अटोको ठक्करबाट सोही ठाउँ बस्ने गीता भट्टको छोरा ३ वर्षीय प्रियान्स भट्टको बुधबार बेलुकी मृत्यु भएको छ । ठक्करबाट गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । अटो चालकलाई प्रहरीले नियन्त्रणमा लिएको छ ।
सुनसरीको दुहबी नगरपालिका–८ पशुपति खाद्य उद्योग अगाडि सडकमा इटहरीबाट विराटनगरतर्फ जाँदै गरेको प्र. १–०२–०६०प २१२३ नम्बरको स्कुटर अनियन्त्रित भई बुधबार दिउँसो दुर्घटना हुँदा चालक मोरङ विराटनगर महानगरपालिका–३ बस्ने ४२ वर्षीया खगमाया खरेलको मृत्यु भएको छ । दुर्घटनामा गम्भीर घाइते भएकी उनको विराट नर्सिङ होम विराटनगरमा उपचारको क्रममा मृत्यु भएको हो । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
