काठमाडौं, जेठ १५ । अर्थमन्त्री डा. स्वर्णिम वाग्लेले आगामी आर्थिक वर्ष २०८३/८४ को बजेट प्रस्तुत गर्दै कर प्रणालीमा व्यापक सुधार गरिएको घोषणा गरेका छन्। बजेट भाषणको सुरुवातमा उनले ७५ वर्षअघि सुवर्ण शमशेरले पहिलो पटक बजेट प्रस्तुत गरेको स्मरण गर्दै बजेटले अर्थतन्त्र रूपान्तरण गर्ने विश्वास व्यक्त गरे।
सरकारले करका दरमा बृहत पुनरावलोकन गर्दै प्रतिव्यक्ति आयकर छुटको सीमा दोब्बर वृद्धि गरी १० लाख रुपैयाँ पुर्याएको छ। साथै, ३६० वस्तुमा लाग्दै आएको अन्तःशुल्क पूर्ण रूपमा खारेज गरिएको छ भने २७३ प्रकारका वस्तुको भन्सार दर घटाइएको छ।
यसैगरी, हाल ११ तहमा रहेको भन्सार दरलाई घटाएर ७ तहमा सीमित गरिएको अर्थमन्त्री वाग्लेले जानकारी दिए।
२७३ प्रकारका कच्चा पदार्थमा भन्सार दर घटाइयो
सरकारले औद्योगिक क्षेत्रलाई प्रोत्साहन गर्न २७३ प्रकारका कच्चा पदार्थमा भन्सार महसुल घटाएको छ। अर्थमन्त्री वाग्लेले औद्योगिक कच्चा पदार्थको भन्सार महसुल तयारी वस्तुको तुलनामा कम्तीमा एक तह कम हुने व्यवस्था गरिएको बताए।
उनका अनुसार यस कदमले स्वदेशी उद्योगको उत्पादन लागत घटाउन तथा प्रतिस्पर्धात्मक क्षमता बढाउन सहयोग पुग्ने अपेक्षा गरिएको छ।
धितोपत्र बिक्रीबाट प्राप्त पुँजीगत लाभकर अन्तिम कर मानिने
अर्थमन्त्री वाग्लेले सूचीकृत कम्पनीका धितोपत्र बिक्रीबाट प्राप्त हुने पुँजीगत लाभकरलाई अन्तिम करका रूपमा लिने व्यवस्था गरिएको घोषणा गरेका छन्।
यसअघि शेयर वा सम्पत्ति बिक्रीबाट प्राप्त नाफामा पुँजीगत लाभकर लाग्ने व्यवस्था भए पनि उक्त कर अन्तिम हो वा आय विवरणमा पुनः समावेश गर्नुपर्ने हो भन्ने विषयमा व्यवहारिक अन्योल रहँदै आएको थियो।
अब भने ब्रोकरमार्फत स्रोतमा कट्टी हुने करलाई नै अन्तिम करका रूपमा मान्यता दिइने व्यवस्था गरिएको सरकारले स्पष्ट पारेको छ।
