काठमाडौं, असार १२ । नेपाली कांग्रेसभित्र संस्थापन र इतर पक्षबीच आन्तरिक बहस तथा पार्टीलाई एकजुट बनाउने प्रयास चलिरहेका बेला दुई प्रभावशाली नेताहरूबीच महत्त्वपूर्ण भेटवार्ता भएको छ।

कांग्रेसका वरिष्ठ नेता डा. शेखर कोइराला र विशेष महाधिवेशनबाट निर्वाचित महामन्त्री गुरुराज घिमिरेबीच कोइराला निवास विराटनगरमा भेटघाट भएको हो। डा. कोइराला समूहमा रहेर लामो समय कांग्रेस राजनीतिमा सक्रिय रहेका घिमिरे विशेष महाधिवेशनपछि भने गगन थापा समूहमा आवद्ध रहेका छन्। फरक-फरक उपसमूहमा रहेका यी दुई नेताबीचको यो संवादलाई कांग्रेसको आन्तरिक राजनीतिमा निकै अर्थपूर्ण रूपमा हेरिएको छ।

भेटघाटका क्रममा मुलुकको पछिल्लो राजनीतिक अवस्था र समसामयिक विषयहरूमा गहन छलफल भएको महामन्त्री घिमिरेले सामाजिक सञ्जालमार्फत जानकारी दिएका छन्। कांग्रेसभित्रको पछिल्लो समीकरण र आन्तरिक गतिविधिका माझ भएको यस भेटमा पार्टीलाई भावनात्मक रूपमै ‘एक ढिक्का’ र एकीकृत बनाउने विषयमा केन्द्रित रहेर दुई नेताबीच महत्त्वपूर्ण कुराकानी भएको अनुमान गरिएको छ।