चितवन, असार १२ । चितवनको राप्ती नगरपालिका–८ खुरखुरेस्थित सडकमा ना.५ ख ८७५५ नम्बरको ट्रकको ठक्करबाट पैदलयात्री हाल नाम, थर र वतन नखुलेका अन्दाजी ३५ वर्षीय पुरूषको बिहीबार राति मृत्यु भएको छ । ठक्करबाट गम्भीर घाइते भएका उनको सरकारी अस्पताल भरतपुरमा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ ।
रूपन्देहीको तिलोत्तमा नगरपालिका–३ शान्ति चोकस्थित सडकमा रोकी राखेको लु.१ च ६२४२ नम्बरको पिकअपमा जैकुटीबाट मगरघाटतर्फ जाँदै गरेको लु. ६८ प ४२०९ नम्बरको मोटरसाइकल ठक्कर खाई गए राति दुर्घटना हुँदा मोटरसाइकल चालक बुटवल उपमहानगरपालिका–१७ रानीगंज बस्ने २७ वर्षीय अर्जुन जिसीको मृत्यु भएको छ । दुर्घटनामा गम्भीर घाइते भएका उनको चौराहा अस्पताल बुटवलमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ । पिकअप चालकलाई प्रहरीले नियन्त्रणमा लिएको छ ।
धनुषाको मिथिला बिहारी नगरपालिका–७ स्थित सडकमा धनुषाधामबाट जनकपुरतर्फ जाँदै गरेको ना. ५९ प ९७८७ नम्बरको मोटरसाइकलले पैदलयात्रीलाई ठक्कर दिई बिहीबार बेलुकी दुर्घटना हुँदा २ जनाको मृत्यु भएको छ । मृत्यु हुनेहरूमा पैदलयात्री सोही ठाउँ बस्ने ६० वर्षीया निर्मली नदाफ र मोटरसाइकलमा सवार धनुषाधाम नगरपालिका–२ मंगलपुर बस्ने २० वर्षीय संजिव साह रहेका छन् । दुर्घटनामा गम्भीर घाइते भएका उनीहरूको प्रादेशिक अस्पताल जनकपुरमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
