काठमाडौं, असार ३० । सर्लाहीका २६ वर्षीय विवेक मण्डल (यादव), जसले केही दिनअघि आफैँमाथि पेट्रोल छर्केर आत्मदाहको प्रयास गरेका थिए, उनको उपचारका क्रममा मंगलबार बिहान कीर्तिपुरस्थित बर्न अस्पतालमा निधन भएको छ। जिल्ला प्रहरी परिसर काठमाडौँका एसपी पवनकुमार भट्टराईले उपचारकै क्रममा मण्डलको मृत्यु भएको पुष्टि गरेका छन्।
परिवारका अनुसार जीवविज्ञानमा स्नातकोत्तर गरेका विवेक सर्लाहीको रामनगरस्थित एक विद्यालयमा अध्यापन गराउँदै आएका थिए। तर, विद्यालयले उनको स्थानमा अर्का व्यक्तिलाई नियुक्त गरेपछि उनी करिब एक वर्षदेखि बेरोजगार थिए।
रोजगारी गुमेपछि आर्थिक तथा मानसिक तनाव बढ्दै गएको र उनी केही समयदेखि डिप्रेसनको समस्यासँग जुधिरहेका थिए भन्ने परिवारको भनाइ छ।
सोही मानसिक अवस्थाका बीच उनले आफैँमाथि पेट्रोल छर्केर आगो लगाएका थिए। गम्भीर घाइते भएका उनलाई गत शुक्रबार हेलिकप्टरमार्फत काठमाडौँ ल्याई साँझ करिब ७:३० बजे कीर्तिपुरस्थित बर्न अस्पतालमा भर्ना गरिएको थियो। चिकित्सकहरूको निरन्तर प्रयासका बाबजुद उनको मंगलबार बिहान उपचारकै क्रममा निधन भएको हो।
