काठमाडौं, साउन १९ । सुनसरीको देवानगञ्ज गाउँपालिका–३, कप्तानगञ्जमा साउन १० गते दुई पक्षबीच भएको झडपका क्रममा प्रहरीको गोली लागी घाइते भएका २२ वर्षीय रवीन्द्रकुमार मेहताको काठमाडौँमा उपचारका क्रममा निधन भएको छ।
विराट नर्सिङ होममा प्रारम्भिक उपचार गराइएपछि थप उपचारका लागि काठमाडौंस्थित त्रिवि शिक्षण अस्पताल (टिचिङ) मा भर्ना गरिएका उनको उपचारकै क्रममा मंगलबार बिहान निधन भएपछि मेहताको शव परिवारले बुझ्न मानेको छैन। सरकारसँग स्पष्ट सम्झौता नभएसम्म शव नबुझ्ने र अन्त्येष्टि नगर्ने अडान पीडित परिवार र आफन्तले लिएका छन्।
त्रिवि शिक्षण अस्पतालको आईसीयू कक्ष बाहिर बसिरहेका आफन्तहरूले घटनाको विषयमा गृहमन्त्री स्वयं उपस्थित भएर माग सम्बोधन गर्नुपर्ने माग राखेका छन्। अस्पताल परिसरमा आफन्तहरूको उपस्थिति बाक्लो बन्दै गएको छ भने माग पूरा नभएसम्म अस्पतालबाट नफर्कने उनीहरूको चेतावनी छ।
यसअघि यसै घटनामा मृत्यु भएका अन्य तीन जनाका परिवारसँग सरकारले सहिद घोषणा, आर्थिक सहायता र रोजगारीलगायतका बुँदामा सहमति गरिसकेकाले रवीन्द्रका परिवारले पनि सोही अनुरुप समान सम्झौता भएपछि मात्र शव बुझ्ने अडान राखेका छन्। प्रहरीको गोली लागेर गम्भीर घाइते भएका मेहताको मंगलबार बिहान त्रिवि शिक्षण अस्पतालमा उपचारकै क्रममा निधन भएको थियो।
