काठमाडौं, साउन ३१ । नेकपा (एमाले)का अध्यक्ष तथा पूर्वप्रधानमन्त्री केपी शर्मा ओलीले अनुभव, क्षमता र ज्ञानविना राज्य सञ्चालनको जिम्मेवारी दिँदा देशले नकारात्मक परिणाम भोग्नुपर्ने बताएका छन्।
इलाममा आयोजित लोकतान्त्रिक आदिवासी जनजाति महासंघ, नेपालको केन्द्रीय कमिटी बैठकलाई सम्बोधन गर्दै अध्यक्ष ओलीले सरकारको कार्यशैलीप्रति टिप्पणी गर्दै अनुभवहीन व्यक्तिलाई जिम्मेवारी दिँदा शासन सञ्चालन प्रभावकारी हुन नसक्ने बताए। उनले शासन सञ्चालनका लागि आवश्यक ज्ञान, क्षमता र अनुभव अपरिहार्य हुने उल्लेख गरे।
“खाना बनाउन नजान्ने बच्चालाई भान्सामा पठाउँदा उसले तरकारी काट्नेदेखि चिया बनाउनसम्म सबै कुरा बिगार्न सक्छ। नाच्न नजानेकोलाई नचाउँदा राम्रो नाच्न सक्दैन, मादल बजाउन नजान्नेलाई मादल दिँदा राम्रो संगीत निस्कँदैन,” ओलीले भने, “शासन चलाउन पनि त्यस्तै अनुभव, क्षमता र ज्ञान चाहिन्छ। जानेकाले गर्ने ठाउँमा अनुभवहीन व्यक्तिलाई जिम्मेवारी दिँदा देश बर्बाद हुने अवस्था आउँछ।”
ओलीले संविधानको मर्म र भावना विपरीत गतिविधि भएको आरोप लगाउँदै संविधानलाई सही मार्गमा फर्काउन आवश्यक रहेको बताए। उनले प्रतिनिधिसभा विघटनको विषय उठाउँदै त्यसको औचित्यमाथि प्रश्नसमेत गरे।
“प्रतिनिधिसभाको कार्यकाल बाँकी हुँदाहुँदै किन विघटन गरियो? समय हुँदाहुँदै संसद् विघटन गरेर फेरि अर्को संसद् किन आवश्यक पर्यो? यसको जवाफ जनताले खोज्नुपर्छ,” उनले भने।
उनले संविधानको संरक्षण र लोकतान्त्रिक प्रणालीको सुदृढीकरणका लागि सबै पक्ष जिम्मेवार हुनुपर्ने धारणा व्यक्त गरे।
