काठमाडौं, असोज ५ । नेपाल टेलिकमले गत भदौ १० गते रसुवाको भोटेकोशी नदीमा आएको बाढीबाट प्रभावित नागरिकलाई लक्षित गरी राहत तथा सञ्चार सुविधा विस्तार गरेको छ । कम्पनीले रसुवा, धादिङ, गोरखा, चितवन, नुवाकोट र तनहुँका बाढी प्रभावित नागरिकसँगै पृथ्वी राजमार्गअन्तर्गत गल्छी–नुवाकोट–रसुवा–स्याफ्रुबेँसी तथा मुग्लिन–नारायणगढ सडक क्षेत्र आसपासका प्रभावितलाई विभिन्न सुविधा उपलब्ध गराउने व्यवस्था गरेको हो ।
बाढीका कारण क्षति भएका र पुनः प्रयोग गर्न नसकिने अवस्थामा पुगेका एनटी फाइबर केबल तथा राउटर निःशुल्क उपलब्ध गराई जडान गर्ने व्यवस्था नेपाल टेलिकमले गरेको छ । त्यस्तै, एनटी फाइबर सेवा प्रयोग गरिरहेका ग्राहकको सेवा अवधि समाप्त भएमा तीन महिनासम्म निःशुल्क अवधि थप गरिने जनाएको छ ।
बाढी प्रभावित क्षेत्रमा रहेका ग्राहकको नाममा दर्ता भएका सिमकार्ड पुनः वितरण गर्ने व्यवस्था पनि गरिएको छ । यसका लागि पाँचवटा सम्पर्क नम्बर उपलब्ध गराउनुपर्ने, ती नम्बर बाढी प्रभावित क्षेत्रमा प्रयोग भएको हुनुपर्ने तथा सम्बन्धित नम्बरको पहिचान प्रमाणीकरण प्रक्रिया पूरा गर्नुपर्ने व्यवस्था गरिएको छ । बाढीका कारण विभिन्न स्थानमा फसेका व्यक्तिसँग सञ्चार सम्पर्क कायम गर्न नेपाली सेनाको समन्वयमा २१० थान सिमकार्डसमेत उपलब्ध गराइएको टेलिकमले जनाएको छ । प्रभावित क्षेत्रका ग्राहकलाई प्याकेजसहित वितरण गरिएका ती सिमकार्डको विवरण अद्यावधिक गरी अभिलेख राख्ने व्यवस्था गरिएको छ ।
त्यसैगरी, राष्ट्रिय विपद् जोखिम न्यूनीकरण तथा व्यवस्थापन प्राधिकरणको मुख्य सर्भरदेखि प्राधिकरणमा रहेको ब्याकअप सर्भरसम्म निःशुल्क कनेक्टिभिटी स्थापना गर्न आवश्यक फाइबर अप्टिकल कनेक्टिभिटीसमेत उपलब्ध गराइएको छ । बाढी प्रभावित क्षेत्रका नागरिकलाई प्राथमिक मनोवैज्ञानिक सहयोग तथा मनोपरामर्श सेवा उपलब्ध गराउँदै आएको मानसिक स्वास्थ्य तथा परामर्श केन्द्र–नेपालको टोल फ्री नम्बर १८१०५०००४०२ मा तीन महिनासम्म मासिक बिल निःशुल्क हुने व्यवस्था नेपाल टेलिकमले गरेको छ ।
राहत संकलन तथा व्यवस्थापनका लागि जिल्ला प्रशासन कार्यालय काठमाडौंको समन्वयमा नेपाल प्रहरी विपद् उद्धार एवम् प्रतिकार्य तालिम केन्द्र र राधास्वामी सत्संग व्यास नेपाल, सामाखुशी केन्द्रमा एक महिनाका लागि १०० एमबीपीएस क्षमताको निःशुल्क इन्टरनेट सेवा उपलब्ध गराइएको छ । त्यस्तै, जिल्ला प्रशासन कार्यालय भरतपुरमा रहेको विपद् व्यवस्थापन युनिटका लागि एक वर्षसम्म १०० एमबीपीएस क्षमताको निःशुल्क इन्टरनेट सेवा उपलब्ध गराइएको टेलिकमले जनाएको छ ।
रसुवा बाढीबाट प्रभावित क्षेत्रबाट प्राप्त हुने सूचना, क्षतिको विवरण, राहत तथा उद्धारसम्बन्धी जानकारी, फिल्ड रिपोर्ट, फोटो तथा भिडियो लगायतका तथ्याङ्क समयमै संकलन र प्रवाह गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई एक वर्षका लागि उच्च गतिको निःशुल्क इन्टरनेट तथा प्राविधिक सहयोग पनि उपलब्ध गराइएको छ ।
नेपाल टेलिकमले बाढी प्रभावित क्षेत्रको राहत, उद्धार तथा पुनस्र्थापनाका लागि कर्मचारीको योगदानसहित विभिन्न शीर्षकमा यसअघि नै झन्डै २० करोड रुपैयाँ सहयोग उपलब्ध गराइसकेको जनाएको छ । बाढीका कारण प्रभावित क्षेत्रमा करोडौं रुपैयाँ बराबरको दूरसञ्चार पूर्वाधारमा क्षति पुगेको जनाउँदै कम्पनीले क्षतिग्रस्त संरचनाको पुनर्निर्माण तथा सेवा पुनःस्थापनाको कामसमेत जारी राखेको छ ।
नेपाल टेलिकमका प्रवक्ता डा. कमल लामिछानेका अनुसार बाढी प्रभावित नागरिकलाई तत्काल सञ्चार सम्पर्कमा जोड्ने, राहत तथा उद्धारसम्बन्धी सूचना प्रवाहलाई सहज बनाउने र विपद् व्यवस्थापनमा सहयोग पु¥याउने उद्देश्यले यी अतिरिक्त सेवा तथा सुविधा उपलब्ध गराइएको हो ।
