काठमाडौं, असोज १६ । टीभीएस मोटर कम्पनीका लागि नेपालको आधिकारिक वितरक जगदम्बा मोटर्स प्रालि. (टीभीएस नेपाल) ले सञ्चालन गर्दै आएको ‘अपाचे रेस एक्सपेरियन्स (एआरई) जीपी’ अन्तर्गत पहिलो ‘अपाचे रेसिङ क्वालिफायर’ शनिबार बुटवलमा आयोजना हुने भएको छ ।
तिलोत्तमा–५, मणिग्रामस्थित श्री गौरांग इजीवे ट्रायल सेन्टरमा हुने क्वालिफायरमा सहभागी राइडरका लागि कार्यक्रम बिहान ८ बजेदेखि सुरु हुनेछ भने सञ्चारकर्मी, अतिथि तथा कन्टेन्ट क्रिएटरका लागि बिहान ११ बजेदेखि कार्यक्रम खुला गरिनेछ । बुटवल एआरई जीपीको क्वालिफायर राउन्ड आयोजना गर्ने पहिलो सहर बनेको छ ।
क्वालिफायरमा सहभागी राइडरलाई राइडिङ पोस्चर, कर्नरिङ, लिनिङ, ब्रेकिङ र भिजन कन्ट्रोल लगायतका विषयमा सैद्धान्तिक प्रशिक्षण दिइनेछ । त्यसपछि प्रशिक्षकको निगरानीमा ट्र्याकमा विभिन्न ड्रिल अभ्यास गराइनेछ । प्रशिक्षणपछि १६० सीसी र २०० सीसी गरी दुई विधामा प्रतिस्पर्धात्मक रेस हुनेछ । प्रत्येक विधाका शीर्ष तीन राइडर काठमाडौंको सतुंगलस्थित भेहिकल एकेडेमी एन्ड रिसर्च सेन्टरमा आयोजना हुने एआरई ग्रान्ड फिनालेका लागि छनोट हुनेछन् ।
ग्रान्ड फिनालेमा थप ट्र्याक प्रशिक्षण तथा सैद्धान्तिक कक्षापछि दुवै विधामा प्रतिस्पर्धा हुनेछ । प्रत्येक विधाका प्रथम हुने राइडरले भारतको मद्रास इन्टरनेसनल सर्किटमा आयोजना हुने अन्तर्राष्ट्रिय १६० सीसी र २०० सीसी रेसिङमा ५० भन्दा बढी देशका राइडरसँग प्रतिस्पर्धा गर्दै नेपालको प्रतिनिधित्व गर्ने अवसर पाउनेछन् ।
अन्तर्राष्ट्रिय प्रतिस्पर्धामा सफल हुने राइडरले सम्बन्धित विधाका थप अन्तर्राष्ट्रिय रेसमा सहभागी हुने अवसरसमेत पाउनेछन्। यसका लागि आवश्यक यात्रा तथा आवास खर्च टीभीएस नेपाल र टीभीएस मोटर कम्पनी, भारतले व्यहोर्ने जनाइएको छ । फिनालेका विजेतालाई मोटो जीपी र मोटोसोलको खर्चसहितको भ्रमणसमेत उपलब्ध गराइनेछ ।
बुटवल क्षेत्रका टीभीएसका आधिकारिक डिलर बालाजी अटोमोबाइल्सका सञ्चालक विशाल जैसवालले एआरई जीपीको पहिलो क्वालिफायर बुटवलबाट सुरु हुनु स्थानीय राइडरका लागि गौरवको विषय भएको बताए। लुम्बिनी क्षेत्रमा प्रतिभाशाली राइडर भए पनि उनीहरूलाई सुरक्षित र व्यावसायिक वातावरणमा सिक्ने तथा प्रतिस्पर्धा गर्ने मञ्च आवश्यक रहेको उनको भनाइ छ ।
टीभीएसले सन् १९८२ देखि मोटरस्पोर्टमा सहभागिता जनाउँदै आएको छ । कम्पनीले इन्डियन नेसनल मोटरसाइकल रेसिङ च्याम्पियनसिपमा ११ पटक उपाधि जितेको तथा सन् २०१५ मा डकार ¥यालीमा सहभागी हुने पहिलो भारतीय निर्माता बनेको जनाएको छ। यही रेसिङ विरासतलाई नेपालमा ट्र्याक अनुभवसँग जोड्ने उद्देश्यले एआरई जीपी सञ्चालन गरिएको हो ।
बुटवलपछि काठमाडौं, नेपालगञ्ज, इटहरी र पोखरामा समेत क्वालिफायर राउन्ड आयोजना हुनेछन्। इच्छुक राइडरले टीभीएस नेपालको आधिकारिक फेसबुक तथा इन्स्टाग्राम पेजमा उपलब्ध क्यूआर कोड स्क्यान गरी दर्ता गर्न सक्नेछन्
