तनहुँ ,असार ७
तनहुँ जिल्लामा १६ औं राष्ट्रिय खुल्ला नकआउट भानुकप फुटवल प्रतियोगिता हुने भएको छ । आगामी असार २९ गतेदेखि साउन ६ गतेसम्म भन्सार बजार स्थित क्षेत्रीय भानु रंगशालामा सञ्चालन हुने प्रतियोगिताको विजेताले नगद रु. दुई लाख २५ हजार २ सय १० उपविजेताले नगद रु.एक लाख, १२ हजार २ सय १० सहित ट्रफी, मेडल र प्रमाणपत्र प्राप्त गर्ने आयोजकले बताएको छ ।
यसैगरी प्रतियोगितामा तृतीय हुने टोलीले रु.२० हजार २ सय १० प्राप्त गर्नेछ । यसबाहेक प्रतियोगिताका उत्कृष्ट खेलाडी, उत्कृष्ट गोलरक्षक, सर्वाधिक गोलकर्तालाई जनही रु.५ हजार २ सय १० र अनुशासित टिम तथा प्रत्येक खेलको म्यान अफ दि म्याचलाई विशेष पुरस्कारको व्यवस्था रहेको आयोजकले बताएको छ । प्रतियोगितामा सहभागी हुने टिमहरुले असार १५ देखि २७ गतेसम्म टिम दर्ता गराइसक्नुपर्ने आयोजकले बताएको छ । टिम दर्ता शुल्क १२ हजार २ सय १० रहेको छ ।
भन्सार युवा परिवार, साल्बिस्ने युवा क्लब र भिमसेन युवा क्लबले संयुक्त रुपमा आयोजना गरेको प्रतियोगिता तनहुँ जिल्लाकै सर्वाधिक धनराशी पुरस्कार राशि रहेको आयोजकले बताएको छ । राष्ट्रिय विभूति आदिकवि भानुभक्त आचार्यको जन्म जयन्तीका अवसरमा हरेक वर्ष आयोजना गरिदै आएको राष्ट्रिय खुल्ला नकआउट भानुकप फुटवल प्रतियोगिताको यस वर्षको संस्करणको तयारी तीव्र रुपमा गरिएको आयोजकले बताएको छ ।
२१० औं भानु जयन्तीको अवसरमा असार २९ गतेबाट सुरु हुने प्रतियोगिताको तयारी अघि बढेको मूल आयोजक समितिका संयोजक सुरेन्द्र कुमार श्रेष्ठले नविन खबरलाई बताउनुभयो । श्रेष्ठका अनुसार अहिले प्रचार–प्रसार तथा विभिन्न सरोकारवालाहरुसँग भेटघाट, रंगशालाको स्तरोन्नती लगायतका काम भइरहेको छ ।
राष्ट्रिय विभूति भानुभक्त आचार्यको जन्मस्थलको प्रचारप्रसारका साथै खेल र खेलाडीलाई सम्मानका लागि पनि हरेक वर्ष भन्सार युवा परिवारले एकल रुपमा आयोजना गर्दै आएको भानु कप यस पटक भन्सार क्षेत्रमा क्रियाशिल अन्य क्लबहरुसँग पनि सहकार्य र सद्भाव बढाउने उद्देश्यले संयुक्त रुपमा आयोजना गरिएको हो । सोही अवसरमा छेलो र बाघचाल प्रतियोगिता पनि हुने भएको छ । उक्त प्रतियोगिताहरुमा प्रथम हुनेले रु.५ हजार, २ सय १० र प्रमाणपत्र प्राप्त गर्ने छन् भने सहभागिताका लागि दर्ता शुल्क रु. दुई सय १० तोकिएको छ ।
