काठमाडौं । काठमाडौंमा जारी दोस्रो संस्करणको नेपाल प्रिमियर लिग (एनपीएल) अन्तर्गत आज दुई खेल हुँदैछन् ।
पहिलो खेल साविक विजेता जनकपुर बोल्ट्स र चितवन राइनोजबीच टियु रङ्गशाला कीर्तिपुरमा बिहान ११:४५ बजेदेखि जारी छ भने अपराह्न ४ बजे हुने दोस्रो खेलमा पोखरा एभेन्जर्स र कर्णाली याक्स भिड्दैछन् ।
चितवन र जनकपुर बोल्ट्स दुवैको यो पाँचौं खेल हो । लगातार चार खेल हारेपछि तालिकाको पुछारमा रहेको जनकपुरले जित हासिल गरेर प्लेअफको सम्भावनालाई जीवित राख्ने प्रयास गर्नेछ ।
चितवनले यसअघिको ४ खेलमा २ जित र २ हार व्यहोरेको छ । चितवनले यो खेल जितेर प्लेअफको सम्भावना बलियो बनाउन चाहन्छ ।
अपराह्न ४ बजे हुने दोस्रो खेलमा पोखरा एभेन्जर्स र कर्णाली याक्सबीच प्रतिस्पर्धा हुँदैछ । प्लेअफमा पुग्ने लक्ष्यका साथ दुवै टोलीका लागि खेल महत्वपूर्ण छ । चार खेलमा केवल एक जित हासिल गरेको पोखराले आज जित हासिल गरेमा प्लेअफको बाटोमा पुग्न सहज हुनेछ ।
नेपाल प्रिमियर लिगमा उन्नाइस खेल सम्पन्न भइसकेका छन् । यहाँसम्म आउदा सुदूरपश्चिम रोयल्स १० अंकसहित प्लेअफमा पुग्ने पहिलो टोली बनेको छ।
