बंगलादेश, फागुन १ । बंगलादेशमा सम्पन्न १३ औँ संसदीय निर्वाचनको प्रारम्भिक नतिजाअनुसार बंगलादेश नेसनलिस्ट पार्टी (बिएनपि) स्पष्ट बहुमततर्फ अघि बढेको छ।
कुल ३०० सदस्यीय संसदमा १५१ सिट सुरक्षित गर्दै बीएनपीले बहुमतको आँकडा पार गरिसकेको छ भने जमात-ए-इस्लामी ४३ सिटसहित मुख्य विपक्षी दलका रूपमा उदाएको छ। सन् २०२४ को जनविद्रोह र पूर्वप्रधानमन्त्री शेख हसिनाको १५ वर्षे शासनको अन्त्यपछि भएको यो पहिलो आम निर्वाचनलाई बंगलादेशको राजनीतिक संक्रमणको महत्वपूर्ण मोड मानिएको छ।
बिहीबार सम्पन्न मतदानमा करिब ४७.९१ प्रतिशत मत खसेको निर्वाचन आयोगले जनाएको छ। मतदाताले संसदीय प्रतिनिधि र राष्ट्रिय जनमत सङ्ग्रहका लागि दुईवटा छुट्टाछुट्टै मतपत्रमार्फत मतदान गरेका थिए। १७ वर्षको निर्वासनपछि स्वदेश फर्किएका तारिक रहमानको नेतृत्वमा बीएनपीले यो चुनावी सफलता हात पारेको हो। पर्यवेक्षकहरूका अनुसार निर्वाचन तुलनात्मक रूपमा शान्तिपूर्ण रहेको थियो र अबको केही समयमा अन्तिम नतिजा सार्वजनिक हुने अपेक्षा गरिएको छ।
