काठमाडौं, फागुन २८ । नेकपा (एमाले) कास्कीका इन्चार्ज कृष्ण थापाको निधन भएको छ। बिहीबार पार्टीको जिल्ला कमिटीले आयोजना गरेको चुनावी समीक्षा बैठकमा सम्बोधन गर्ने क्रममा अचानक ढलेका थापाको हृदयघातका कारण निधन भएको हो। उनलाई तत्काल उपचारका लागि पोखराको मणिपाल शिक्षण अस्पताल लगिएको थियो, जहाँ चिकित्सकले उनलाई मृत घोषणा गरे।

Advertisement

थापा एमालेभित्रका एक अनुभवी र स्थापित नेता थिए। उनले वि.सं. २०५४ मा पोखराको मेयर निर्वाचित भएर स्थानीय विकासको नेतृत्व गरेका थिए भने २०७४ सालको निर्वाचनमा गण्डकी प्रदेश सभा सदस्यका रूपमा चुनिएका थिए। २०७९ को स्थानीय तह निर्वाचनमा उनी पुनः पोखराको मेयर पदका उम्मेदवार बने पनि पराजित भएका थिए। पार्टीको समीक्षा बैठकमै सम्बोधन गर्दागर्दै भएको उनको यो असामयिक निधनले एमाले र पोखरेली राजनीतिमा ठुलो क्षति पुगेको छ।