काठमाडौं, वैशाख १६ । जल तथा मौसम विज्ञान विभागको पछिल्लो पूर्वानुमान र मौसमी मोडलिङलाई मध्यनजर गर्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले देशभर उच्च सतर्कता अपनाउन सार्वजनिक अपिल गरेको छ।
देशका विभिन्न भागमा तीव्र गतिको हावाहुरी, मेघगर्जन, चट्याङ र असिनासहित वर्षाको प्रबल सम्भावना देखिएपछि प्राधिकरणले ‘अलर्ट’ जारी गरेको हो। यो मौसमी प्रणाली विशेषगरी सुदूरपश्चिमका कञ्चनपुर, डडेल्धुरा र डोटीबाट सुरु भई क्रमशः पूर्वतर्फ सर्दै लुम्बिनीका बर्दिया, बाँके, दाङ, अर्घाखाँची; गण्डकी र बागमतीका नवलपुर, चितवन; मधेशका बारा, पर्सा, धनुषा तथा कोशी प्रदेशका झापा र मोरङ लगायतका जिल्लाहरूमा बढी सक्रिय हुने देखिएको छ।
हावाहुरी र चट्याङ सुरु हुनासाथ तत्काल सुरक्षित स्थान वा घरभित्र जान र झ्यालढोका राम्ररी बन्द गर्न प्राधिकरणले आग्रह गरेकाे छ। तीव्र गतिको हावाहुरीले बाहिर बालिएको आगो उडाएर बस्ती वा वनजंगलमा ठूलो आगलागी गराउन सक्ने भएकाले आगो तत्काल निभाउनु पर्नेछ। साथै, कमजोर संरचना, अग्ला रुख, बिजुली तथा टेलिफोनका खम्बा ढल्न सक्ने र लत्रिएका तारहरूबाट करेन्ट लाग्न सक्ने जोखिम रहेकाले त्यस्ता ठाउँबाट टाढा रहन सचेत गराइएको छ। यात्रा गरिरहेका व्यक्तिहरूलाई सवारी साधन सुरक्षित स्थानमा रोक्न र रुखमुनि पार्किङ नगर्न सुझाइएको छ।
मौसममा आउन सक्ने खराबीका कारण हवाई उड्डयन क्षेत्रमा पनि विशेष निगरानी बढाइएको र आवश्यकता अनुसार उडान मार्ग परिवर्तन वा डाइभर्ट गरिने प्राधिकरणले जनाएको छ। विपद्को समयमा तत्काल उद्धार र राहतका लागि सुरक्षा निकाय, जिल्ला विपद् व्यवस्थापन समिति र स्वयम्सेवकहरूलाई तयारी अवस्थामा राखिएको छ। कुनै पनि दुर्घटना भएमा तत्काल नेपाल प्रहरीको १००, सशस्त्र प्रहरीको १११४ वा विपद् उद्धारको टोल फ्री नम्बर ११४९ मा सम्पर्क गर्न अनुरोध गर्दै जल तथा मौसम विज्ञान विभागले हरेक दुई घण्टामा सार्वजनिक गर्ने मौसम अपडेटमा ध्यान दिन समेत आग्रह गरिएको छ।
