काठमाडौं, वैशाख २८ । सार्वजनिक सेवा प्रवाहलाई स्वच्छ र वातावरणमैत्री बनाउने उद्देश्यका साथ आजदेखि देशका संघीय, प्रादेशिक र स्थानीय तीनवटै तहका सरकारी कार्यालयहरूमा ‘राष्ट्रिय सरसफाइ सप्ताह’ सुरु भएको छ।
प्रधानमन्त्री तथा मन्त्रिपरिषद्को कार्यालयले जारी गरेको ‘सरसफाइ सप्ताह सञ्चालन निर्देशिका, २०८३’ बमोजिम वीर अस्पतालबाट औपचारिक रूपमा थालनी गरिएको यस अभियानले न्यून लागतमा अधिकतम प्रतिफल हासिल गर्ने लक्ष्य राखेको छ।
निर्देशिका अनुसार अब प्रत्येक कार्यालयले कुहिने र नकुहिने फोहोर छुट्ट्याउन कम्तीमा दुई प्रकारका डस्टबिनको व्यवस्था गर्नुपर्ने, पुराना सामग्रीको उचित व्यवस्थापन गर्नुपर्ने र फोहोर खुला रूपमा जलाउन नपाइने नियम कडाइका साथ लागू गर्नुपर्नेछ। यस अभियानलाई दिगो बनाउन प्रत्येक निकायमा सरसफाइ सम्पर्क व्यक्ति तोकिनेछ भने साप्ताहिक कार्यतालिका र मासिक स्व-मूल्याङ्कनको व्यवस्था गरिएको छ।
यस कार्यक्रमको सफल कार्यान्वयन, अनुगमन र नियमित अभिलेख राख्ने सम्पूर्ण जिम्मेवारी सम्बन्धित कार्यालय प्रमुखलाई सुम्पिएको छ।
