पोखरा, असोज २३ । पोखरा महानगरपालिका–२८, माझथानाबाट कालिकातर्फ विद्यार्थी लिएर आउँदै गरेको कालिका इङ्लिस स्कुलको बस दुर्घटना हुँदा चार विद्यार्थीसहित पाँच जनाको मृत्यु भएको छ। दुर्घटनामा १९ जना घाइते भएका छन्।
शुक्रबार बिहान पोखरा महानगरपालिका–२८ स्थित ओख्लेभीरमा बस दुर्घटनामा परेको हो। प्रहरीका अनुसार बस सडकबाट करिब २०० मिटर तल खसेको थियो।
दुर्घटनामा मृत्यु हुने चारै जना विद्यार्थी कक्षा ९ र १० मा अध्ययनरत रहेको जनाइएको छ। दुर्घटनामा घाइते भएका १९ जनालाई उद्धार गरी उपचारका लागि पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पताल लगिएको छ।
जिल्ला प्रहरी कार्यालयका प्रहरी नायब उपरीक्षक वीरेन्द्रकुमार पासवानका अनुसार घाइतेहरूको उद्धार गरी अस्पताल पठाइएको हो।
दुर्घटना कसरी भयो भन्नेबारे प्रहरीले थप अनुसन्धान गरिरहेको छ। घटनाको विस्तृत विवरण आउन बाँकी छ।
