नयाँ दिल्ली, जेठ ११ । मध्यपूर्वमा जारी युद्ध र बढ्दो तनावका कारण विश्वव्यापी आपूर्ति शृङ्खलामा परेको दबाबबीच भारतमा पेट्रोल र डिजेलको मूल्य फेरि बढेको छ। सोमबार बिहान ६ बजे सरकारी इन्धन कम्पनीहरूले प्रतिलिटर करिब ३ रुपैयाँ मूल्य बढाएपछि आम उपभोक्ता मारमा परेका छन्।
पछिल्लो ११ दिनभित्र मात्रै तेल कम्पनीहरूले चौथो पटक मूल्यवृद्धि गरेका हुन्। यो छोटो अवधिमै पेट्रोल र डिजेलको मूल्य प्रतिलिटर ७ रुपैयाँभन्दा बढीले महँगिएको छ। गत फेब्रुअरीमा युद्ध सुरु भएयता भारतमा अटोमोबाइल इन्धनको मूल्य करिब पाँच प्रतिशतले बढिसकेको छ, जसका कारण पेट्रोलको मूल्य फेरि एकपटक ऐतिहासिक रेकर्ड विन्दु नजिक पुगेको छ।
विशेष गरी इरान र हर्मुज जलघाँटी क्षेत्रमा उत्पन्न तनावले विश्व ऊर्जा आपूर्तिको प्रमुख जलमार्गमा अवरोध सिर्जना गरेको छ। अन्तर्राष्ट्रिय बजारमा ब्रेंट क्रूड (कच्चा तेल) को मूल्य उच्च विन्दुमा पुगेको छ। तेल उत्पादक राष्ट्रहरूको संगठनले कच्चा तेलको उत्पादनमा कटौती जारी राख्नु र भू-राजनीतिक तनाव बढ्नु नै यो संकटको मुख्य कारण हो। भारतले आफ्नो कुल खपतको ८५ प्रतिशत कच्चा तेल विदेशबाट आयात गर्ने भएकाले अन्तर्राष्ट्रिय बजारको हरेक हलचलको प्रत्यक्ष असर यहाँको घरेलू बजारमा देखिने गर्दछ।
सर्वसाधारणको बजेट प्रभावित, महँगी बढ्ने संकेत
इन्धनको मूल्यमा अचानक आएको यो उछालले मध्यम वर्गीय परिवारको बजेट नराम्ररी प्रभावित भएको छ। पछिल्लो दुई हप्तामा मात्रै सवारी साधनको इन्धन खर्च झन्डै १० प्रतिशतले बढेको छ। इन्धन महँगिएसँगै ढुवानी भाडा वृद्धि हुने र यसको सीधा असर बजारमा पर्ने निश्चित छ। आउँदा दिनहरूमा फलफूल, तरकारी, खाद्यान्न लगायतका उपभोग्य सामग्रीको मूल्य बढ्ने खतरा देखिएको छ।
