काठमाडौं । राष्ट्रिय स्वतन्त्र पार्टी (रास्वपा) वरिष्ठ नेता बालेन्द्र शाह (बालेन) ले बुधबार डडेलधुरा पुगेर हिउँ परेको सडकमा उभिएको तस्वीर सार्वजनिक गर्दै सामाजिक सञ्जालमा लेखेका छन्— ‘सुदुर अब दुर नाई, झिकै झिकै माया तम्लाई!’। स्थानीय लवजमा लेखिएको यो सन्देशले काठमाडौँ र सुदूरपश्चिमबीचको भावनात्मक दुरी मेटिएको आभास गराउँछ।”
बालेन शाहको यो स्टाटस छोटो छ, तर यसले बोकेको भावना निकै गहिरो र आत्मीय छ। उनले सुदूरपश्चिमको स्थानीय लवज देउडाको शैली मिसाएर त्यहाँका जनतासँगको दुरी मेटिएको सन्देश दिन खोजेका छन्।
सुदूरपश्चिम अब भूगोलको अन्त्य होइन, नयाँ आशाको सुरुवात हो। बालेनको यो छोटो स्टाटसले वर्षौँदेखि उपेक्षित महसुस गरेका सुदूरका मनहरूमा अपनत्वको मलम लगाएको छ। पहाडका कन्दरादेखि सुदूरका देउडासम्म, जब मनहरू जोडिन्छन्, तब देश साँच्चिकै एउटा ढिक्का बन्छ। ‘दुर नाई’ भन्ने शब्दले काठमाडौँ र धनगढीको दुरीलाई शून्य बनाइदिएको छ।
